ნებართვის მარკეტინგი 16 დეკ. 2014

ორი გზა დასაქორწინებლად: პირველი- ახალგაზრდა მამაკაცი ყიდულობს ძვირადღირებულ ტანსაცმელსა და ფეხსაცმელს, ეძებს მარტოხელების ბარს, უახლოვდება პირველივე ლამაზ ქალბატონს და ცოლობას სთხოვს. თუ უარი მიიღო, ასე დაივლის ყველა მარტოხელას კლუბში და ბოლოს დიდი შანსია, ხელცარიელი გამოვიდეს. ეს არის ხელის შეშლის მარკეტინგი (interuption marketing). მოსალოდნელია, მამაკაცმა ყველაფერი ტანსაცმელს დააბრალოს და გამოიცვალოს. ასევს იქცევიან კომპანიებიც. ისინი ქირაობენ სარეკლამო სააგენტოებს, უშვებენ უამრავ რეკლამას და იმედი აქვთ, მომხმარებელი აუცილებლად იყიდის მათ პროდუქტს. თუ სასურველი შედეგი ვერ მიიღეს, ისინი იცვლიან სარეკლამო სააგენტოს. მეორე - როგორ იქცევა ნორმალური მამაკაცი? პირველ რიგში, ის ნიშნავს ქალბატონთან პაემანს. რამდენიმე პაემნის შემდეგ ისინი უკეთ გაიცნობენ ერთმანეთს, ერთმანეთის სურვილებს. რის შემდეგაც ხელის თხოვნა დიდი შანსია, წარმატებით დასრულდეს. ეს არის ნებართვის მარკეტინგი (permission marketing).

ნებართვის მარკეტინგი გულისხმობს, რომ უცხო ადამიანები ვაქციოთ  მეგობრებად და მეგობრები  მუდმივ მომხარებლებად. ხელის შეშლის მარკეტინგი დღეს არ მუშაობს, რადგან თანამედროვე ადამიანს აქვს შეზღუდული თავისუფალი დრო, რომ მიაქციოს ყველა კომპანიის რეკლამას ყურადღება. შესაბამისად, ტრადიციული ცალმხრივი მარკეტინგული კომუნიკაციის საშუალებები სრულიად უსარგებლო ხდება. ამის საპირისპიროდ კი, ნებართვის მარკეტინგი გულისხმობს, რომ მომხარებელი ელოდება კომუნიკაციას, რომელიც მის მიერ არის ნებადართული, განკუთვნილია პერსონალურად მისთვის და წარმოადგენს ღირებულს. მომხარებლებთან პაემნის დასანიშნად უნდა მივყვეთ შემდეგ ნაბიჯებს:

1) შევთავაზოთ მომხარებელს წახალისება, რათა მეორე პაემანზეც დაგვთანხმდეს. თუ პირველი პაემანი იქნება ეგოისტური და მომხარებელი არ იგრძნობს მოსალოდნელ სარგებელს, ის აუცილებლად შეწყვეტს ბრენდთან ურთიერთობას.

2)გამოვიყენოთ უკვე მოპოვებული ყურადღება,რათა მომხარებელს გავაგებინოთ ჩვენი პროდუქტისა და სერვისების შესახებ.

3) მესამე ნაბიჯი არის წამახალისებელი საშუალებების გაუმჯობესება, რადგან დროთა განმავლობაში ერთა და იგივე საშუალება კარგავს ეფექტს.

4)წინა ნაბიჯი საშუალებას გვაძლევს, უფრო გავაღრმავოთ ნებართვის დონე მომხარებლისგან. შესაბამისად უფრო მეტს იგებ მისი ცხოვრების სტილზე, ჰობისა და ინტერესებზე.

5) მიღწეული ნებართვის წყალობით ჩვენ შევძლებთ შევცვალოთ მომხმარებელთა ქცევა, ანუ ნებართვა ვაქციოთ შემოსავლად. ჩვენ უკვე მოპოვებული გვაქვს მთავარი- მომხმარებლის ყურადღება. ასე რომ კომუნიკაციის გაგრძელებით შევძლებთ ორივე მხარისთვის სასარგებლო ურთიერთობის შენარჩუნებას.    

მარკეტერებმა შესაძლებელია მიაღწიონ ნებართვის სხვადასხვა დონეს. ყველაზე ძლიერი დონეა ინტერვენციული,როცა კომპანია მომხარებლის ნაცვლად იღებს ყიდვაზე გადაწყვეტილებას. სარგებელი დიდია, თუმცა ასევე დიდია რისკი, რადგან მარკეტერი შეიძლება შეცდეს მომხმარებლის საჭიროების შეფასებაში. შედარებით დაბალი ნებართვის დონეა, შესყიდვა ნებართვის საფუძველზე, როცა კომპანია ადგენს პროდუქტის სიას და წარუდგენზ მომხარებელს დასადასტურებლად. ამ დონეს მოსდევს ქულების ნებართვის სისტემა, როცა მომხარებელს ყოველ შესყიდვაზე ენიჭება გარკვეული ქულები, რომლის გადაცვლაც შესაძლებელია საჩუქრებში. ასევე აქ შეგვიძლია გავაერთიანოთ შესაძლო მოგების დონე ( გათამაშებები, კონკურსები). ნებართვის მარკეტინგის ყველაზე დაბალი დონეებია პერსონალური ურთიერთობები გამყიდველთან, ბრენდის ნდობა და სიტუაციები. წერტილი როცა ნებართვის მარკეტინგი  ნულის ტოლია, არის სპამი. ნებართვის მარკეტინგის თეორიის ავტორი გახლავთ სეთ გოდინი. წიგნი რამდენიმე წლის წინ არის დაწერილი და უკვე მოძველებულად შეიძლება ჩაითვალოს, თუმცა ძალიან ბევრი საინტერესო რამის სწავლა არის შესაძლებელი. დაინტერესების შემთხვევაში შეძენა შეგიძლიათ   ამ ბმულზე . Click on Seth Head

მოწონება/გაზიარება

კომენტარები